Татар мәгарифе порталы
Күптән түгел В.И.Ульянов–Ленин исемендәге Казан дәүләт университетына халыкара мәгариф буенча Америка советы делегациясе килде. Кунакларны каршы алучылар арасында халыкара элемтәләр идарәсе җитәкчесе Андрей Крылов һәм университетның укыту эшләре буенча проректоры Владимир Бухмин да бар иде. Делегация составында Америка югары уку йортларында рус теле һәм әдәбиятын укытучы педагоглар кергән. Казан дәүләт университетында чит ил стдунтларын укыту мөмкинлеге – очрашуда сүз шуның турында барды.
Бүгенге көндә университет ел да 300–350 чит ил студентына белем бирә. Шуларның 120–150се укуның 5 еллык формасын сайлый. Гадәттә бу хөкүмәтара килешүләр нигезендә эшләнә. Кызганыч, бүгенге көндә дисциплиналарның бик азы гына чит телләрдә укытыла. “Ләкин, – диде Андрей Крылов, – магистратура ачылу белән инглиз теле һәм әдәбияты белгечлегендә хәзер бары инглиз телендә генә белем бирәчәкләр”.
Владимир Бухмин исә КДУның якын киләчәктә тотачак укыту курсы белән уртаклашты: “Белемнең сыйфатын үстерергә кирәк. Көндезге бүлектә якынча 13 мең студент белем ала. Бу санны арттырырга җыенмыйбыз, чөнки беренче урында сан түгел сыйфат торырга тиеш”. Без исә, белемнәрне тикшерүдә балл–рейтинг системасына күчкәч берсүзсез Америка мәгарифенә якынлаша башладык.
Бездә укыган чит ил студентлары рус теле дәрәҗәләрен дә яхшырта ала. Моның өчен алар махсус тестлар узачак. Тест нәтиҗәләре нигезендә студенты теге яки бу группага теркиячәкләр.
Фәридә Мөхәммәдиева фотосы