Татар мәгарифе порталы
Сез монда
Театр, шәһәр һәм Республика көненә багышлап, 25 нче августтан 29 нчы августка кадәр биш спектакль тәкъдим итә.
Г.Камал исемендәге Татар дәүләт Академия театры казанлылар һәм шәһәр кунаклары өчен махсус, шәһәр һәм Республика көненә багышлап, 25 нче августтан 29 нчы августка кадәр биш спектакль тәкъдим итә.
25 нче август көнне Камал театрының иң популяр спектакльләренең берсе - Т.Миңнуллинның “Гөргөри кияүләре” спектакле күрсәтеләчәк. Керәшен татарлары фольклорына нигезләнгән бу җырлы-биюле тамаша 18 ел инде Камал театры сәхнәсендә аншлаг белән бара. Спектакль кичке сәгать алтыда башлана.
26 нчы август көнне - И.Зәйниев әсәре буенча сәхнәләштерелгән “Әрем исе” спектакле. Пьеса “Яңа татар пьесасы 2012” конкурсында беренче премияне яулады. Ике өлештән торган әлеге мелодрамада Камал театрының әйдәп баручы данлыклы артистлары Илдар Хәйруллин, Алсу Гайнуллина, Илдус Әхмәтҗанов, Ринат Таҗетдинов, Зөлфирә Зарипова катнаша. Спектакльне куючы - Башкортостан Республикасының танылган режиссеры Айрат Әбүшахманов. Спектакль кичке сәгать җидедә башлана.
27 нче август көнне Г.Камал театры сәхнәсендә Т.Миңнуллин “Диләфрүз-Remake” спектакле уйнала. Шаян музакаль комедия инде ничә дистә ел үзенең тамашачысын яулап тора. Танылган режиссер Марсель Сәлимҗановның эшен Фәрит Бикчәнтәев тагын да яшәртә, артистларны джинсы чалбарына киендереп, “Азат хатын” журналы урынына “Playboy”ны бирә. Спектакль кичке сәгать җидедә башлана.
28 нче август көнне үткән сезонның премьерасы Т.Миңнуллинның “Мулла” спектаклен күреп булачак. Күренекле драматург Туфан Миңнуллинның соңгы әсәрләреннән берсе булган “Мулла” пьесасы 2006 елда узган “Яңа татар пьесасы” конкурсында Татарстан Республикасы Мәдәният министрлыгының махсус премиясенә лаек булган иде. Спектакль кичке сәгать җидедә башлана.
29 нчы август көнне - Камал театрының йөзек кашы “Зәңгәр шәл” (Кәрим Тинчурин) спектакле. Инде ничәнче мәртәбә куелуына карамастан, ул үзенең популярлыгын югалтмый. Халык мәхәббәте аша “Зәңгәр шәл” легендар спектакльгә әверелде. Татар театрын “Зәңгәр шәл”сез күз алдына китерү дә мөмкин түгел. Спектакль кичке сәгать җидедә башлана. Бу хакта театрның матбугат хезмәте хәбәр итә.
Чыганак: http://tat.tatar-inform.ru